Bana nagtan-aw PCM rally, Asawa nagbata higad dalan!

PCM baby, a good sign! – Si Mayor Reynaldo ‘Bongbong’ Constantino kag asawa nga si Roselyn, local People’s Champ Movement campaign manager, samtang lingaw nga nagatan-aw sa isa ka lapsag nga ginbata sang inahan higad dalan (makita pa sa larawan, ang wala pa sini mautud nga pusod) samtang pakadto sa balay tambalanan, tungod kay naglantaw kuno ang bana sang PCM rally sa Brgy. Upper Lumabat, Malungon, Sarangani. (Isagani Palma-MALUNGON INFORMATION OFFICE).

----------------------------------------------------------------------------------------------------------------------------------

MALUNGON, Sarangani – ISA ka inahan ang malampuson nga nagbata sa isa ka waiting shed higad dalan, matapos mapungan sang upod sini ang pasulpot sang bata samtang sakay sa isa ka habal-habal pakadto sa balay tambalanan sa banwa sang Malungon, Sarangani.

            

Dako ang katingala sang mga naga-convoy sa salakyan ni Mayor Reynaldo 'Bongbong' Constantino sang hinali nga magdulog ini kag dali-dali nga manaug pakadto sa isa ka waiting shed kung diin may yara ginaiwagan sang sulu ang mga katawhan, sunod sa pagkatapos sang ginhiwat nga rally sang People’s Champ Movement sa Brgy. Upper Lumabat mga alas 11:00 sang kagabihon.

            

Didto upod nga gin-amuma sang mayor kag sang asawa sini nga si Roselyn ang isa ka inahan (name withheld) nga amo pa lang gid magbata sang isa ka lalaki nga lapsag.

          

Suno sa inpormasyon, nagasakay na ang manugbata pakadto sa balay tambalanan sang makita sang upod sini nga buot na magsulpot ang bata amo nga ginpadulog na lamang ang motor kag ginpaplastar ang inahan.

          

Sa pakig-estorya sa pipila ka katawhan, ginasiling nga nagdesisyon na lamang kuno nga magpadul-ong ang babaye sa ospital tungod wala pa nagkaabot halin sa rally ang bana sini nga isa ka maugod nga suporter sang grupo ni Rep. Manny Pacquiao kag asawa nga si Jinkee nga nagapapili sa pagkakaron para sa pagka-bise gubernadora sang amo nga lalawigan.

          

“Wala pa ambi ang iya bana kay indi man to mapungan nga magtan-aw gid sang rally ni Mayor Bongbong. Amo nga wala ini sang gin-abot na sang pagbata si misis. Maayo nalang gani kay debwenas nga normal man ini nga nakapanganak,” ang siling sang iya silingan.

          

Dako man ang ginpakita nga kalipay ni Mayor Constantino sa natabo, subong man nga ginpasaligan nya gilayon ang pasyente nga magkadto lang sa iya opisina para sa mga ginakinahanglan nga tabang.

          

Suno naman sa pipila ka mga nagapalibut nga mga katigulangan, isa kuno ka maayo nga indikasyon ang natabo para sa isa ka ‘landslide win’ sang grupo PCM diri sa banwa sang Malungon. (Isagani Palma-MALUNGON INFORMATION OFFICE).