3 ka ginsakmit nga mga karabaw, nabawi ni tsip!

Stolen working animals, recovered – Si PCI Lorobe Rojo, hepe sang Malungon police kag Brgy. Capt. Joey Espinosa (left) sa ginhimo nga pagturn-over sang mga nabawi nga tatlo (3) ka ginkawat nga mga karbao,  sa tag-iya nga si JoJo Sepris sa sitio Molayi, Talus. Ang mga kasapatan nga gikatajo nga ginsakmit sang pipila ka mga armado sadtong tatlo na ka bulan ang naglabay, nabawi sang adlaw nga Huwebes sa Brgy. Osmena, Sulop, Davao Del Sur.  (JoJo Gocotano – MALUNGON INFORMATION OFFICE/ ippalma).

Recovery of stolen working animals – DAKO ang ginpakita nga pagpasalamat ni Jojo Sepris, isa ka magtatanum sa sitio Molayi, Brgy. Talus matapos buhi nga nauli sa iya nanday PCI Lorobe Rojo, Malungon police station chief, kag Brgy. Capt. Espinosa ang iya tatlo (3) ka mga karabaw nga ginkawat sang pipila ka mga armado may tatlo na kabulan ang nakalabay. Tungod sa maayo nga pagkoordinar sang mga opisyales sa mga kadapit nga barangay, ang amo nga mga kasapatan narecover sa Brgy. Osmena, Sulop, Davao Del Sur. (JoJo Gocotano – MALUNGON INFORMATION OFFICE/ ippalma).

-----------------------------------------------------------------------------------------------------------------------------------------------------

MALUNGON, Sarangani – BUHI nga nauli sa tag-iya sang kapulisan kag opisyales sang barangay ang tatlo ka mga karabaw sadtong adlaw nga Huwebes, matapos ikatajo nga ginsakmit ang mga ini may tatlo na kabulan ang nakalabay sa sitio Molayi, Brgy. Talus sang amo nga banwa.

                

Sa pakig-estorya sa hepe sang pulisya, si Chief Insp. Lorobe Rojo nagsiling nga nabalik ang amo nga mga kasapatan sa tag-iya nga si Jojo Sepris, matapos ang wala untat nga koordinasyon nga ginhimo sang mga kapulisan sa mga opisyales sang nagkadaiya nga mga barangay hilabi na didto sa dapit sang Davao Del Sur.

                

“Mahimo nga tungod sa padayon nga ginahimo nga pagpatrolya sang aton mga kapulisan sa mga ginapatihan nga alagyan sang mga kawatan, kag sa bulig man kag koordinasyon nga ginahimo sang mga opisyales sang mga nagkadaiya nga mga barangay sa pagpaninguha ni mismo Talus Brgy. Capt. Joey Espinosa, nawad-an na sang paglaum ang mga kreminal nga madala pa ini (karabaw) sa malayo kag madispatsar. Gani ila nalang ginbilin sa masiut nga bahin para makapalayo na sila gilayon sa mga nagalagas ng kapulisan,” ang siling ni Rojo.

                

Gindayeg man maayo ni Malungon Mayor Bongbong Constantino ang amo nga accomplishment sang pulisya, upod ni Kapitan Espinosa.

                

Mahinumduman nga ang banwa sang Malungon amo ang ginakilala nga palanaguan sang mga bandido sadtong panahon nga wala pa sa iya puwesto si Constantino.

                

Sa pagkakaron, madamo ang nagapati nga ang pagkauntat sang pagpangkawat nga amo ang perennial problem sang amo nga lugar sang una nga mga katuigan, natagaan sang nagakaigo nga sulosyon tungod sa sunod-sunod nga pagsurender sang mga lawless elements kay Constantino halin sang makapungko ini bilang alkalde sang tuig 2007. (Isagani Palma – MALUNGON INFORMATION OFFICE).