"Dont ever cross a flooded river"

Don't ever cross a flooded river

MDRRMO rescue and recovery operation – The lifeless body of farmer Waberto Monterola, 51 year-old, when fished out from waters of the composite Municipal Disaster Risk Reduction Management and Bureau of Fire Protection rescue team in Datal-as River, Malungon, Sarangani Province. See related story. (Keen Pacheco –MDRRM Malungon).

----------------------------------------------------------------------------------------------------------------------

MALUNGON, Sarangani – Gilayon nga nadiskubre sang nagresponde nga m’yembro sang Municipal Disaster Risk Reduction Management Office ang patay’ng lawas sang isa ka 51-anyos nga mangunguma nga kuno, bisan ‘nakainom’ nagsulay pa sa pagtabok sa masulog nga sapa’ sa may Buayan Crusher, Brgy. Malandag, Malungon, Sarangani Province.

Siling ni MDRRM Officer Keen Pacheco, ginkilala mismo sang mga nag-upod nga mga m’yemro sang pamilya sa ginhimo nga rescue operation sang MDRRMO kag Bureau of Fire Protection (BFP) ang biktima nga si Waberto Monterola, matapos madiskubre ang patay’ng lawas sini nga nagsabod sa kawayan sa suba, didto na sa may sitio Datal-as.

“Siguro kung wala ini nagsangit sa kawayan basin malayo na ang naabtan sang lawas sang biktima,” ang dugang nga panugiron ni Pacheco.

Hambal sang pila ka mga nakasaksi, yara na sa may hawak banda ang katas-on sang makusog nga pagragasa sang tubig sang maglisensiya si Monterola nga balikan tabok-suba ang iya nakagaid nga karabaw sa may higad pangpang. Gani dala sini ang isa ka wala na sulod nga galonan, nagtabok ini (biktima) pihak pangpang kay kuno “didto nalang ini mag shot-shot sa iya barong.”

Nagtabok ini alas 5:00 sang hapon sang adlaw nga Miyerkules (Hulyo 25) apan wala na makabalik. Gani sa daku nga kabalaka, gin pahibalo dayon sang iya pamilya ang iya pagkadula sa kagamhanan nga amo ang nakadiskubre sang lawas mga banda-9am, sunod-adlaw.

Sa pakighimamat kay Mayor Bongbong Constantino, ini nagsiling nga dapat lamang nga maghalong gid permi ang mga pumuluyo, hilabi na adtong yara sa mga malagyo nga lugar sang banwa kay indi layon ang paghimo sang isa ka emergency rescue operation hilabi na sa tunga sang kagab-ihon. 

“Dapat gid nga indi naton pag-isugal ang aton kinabuhi tungod lang sa tawag sang ilimnon o bisan gani sa ano pa man, tungod kay mas makaluluoy indi lamang ang mahimong biktima, kundi hilabi na gid ang mga magagmay pa nila nga mga kabataan kung madulaan ini sila sang nagaamuma nga mga ginikanan.” (Isagani Palma/ MIO-Malungon, Sarangani Province).

.