 |
| Jinkee endorse retired cop Santos for councilor - Opisyal nga ginendorso ni Jinkee, asawa ni Rep. Manny Pacquiao nga nagapapili sa pagka-bise gubernadora sadtong Sabado (Abril 28, 2013) sang gab-i ang kandidatura ni Benjamin Santos, naging ganhi nga konsehal kag nahimong hepe sang pulisya sa sini nga banwa, para sa pagpili sini sa konseho munisipal. Ang suporta kag pagsalig ginpakita ni Ms. Pacquiao sa ginhiwat nga People’s Champ Movement rally sa Brgy. Upper Mainit, Malungon, Sarangani Province. Makita man sa amo nga laraway ang malipayon nga si Mayor Bongbong Constantino (L) tungod sa ginpakita nga suporta sang gatusan ka mga katawhan nga ginpagunahan ni Brgy. Kapitan Erning Aligaryo, nga sadto isa ka makusog nga oposisyon kontra sa naasoy nga administrasyon. (Isagani Palma – MALUNGON INFORMATION OFFICE). |
 |
| Accurate public service - Si kanhi municipal councilor Arman Guili nga nahimong presidente sa Philippine Councilors League (PCL-Sarangani Chapter) samtang nagahatag kasiguruhan para sa isa ka matuod-tuod nga pagserbisyo kung ugaling mapili sa pagka-board Member sa hunta probinsiya, sa ginhimo nga rally sang People’s Champ Movement sang Sabado (April 28, 2013) nga ginpanguluhan nanday (4th L-R) PCM executive vice president, Mayor Bongbong Constantino kag Jinkee Pacquiao, asawa ni Rep. Manny Pacquiao nga nagapapili sa pagka-bise gubernadora, sa Brgy. Upper Mainit, Malungon, Sarangani. Makita man sa larawan sila (L-R) municipal councilor-reelectionist Adelberto Yuzon, Jun Escalada, Board Member Virgilio Tobias, councilor bet Ben Santos kag si ganhi mun. kagawad Jessie Dela Cruz nga nagapapili para sa pagka-bise mayor. (Mark Eudela – MALUNGON INFORMATION OFFICE). |
MALUNGON, Sarangani – HUGOT ang ginhimo nga pagpa-klaro ni Mayor Bongbong Constantino sa mga akusasyon nga ginbato sa iya sang kaatbang sa pulitika, sa ginhimo nga rally ni independent mayoralty candidate Atty. Julian Nineza sa Brgy. Malandag, Malungon, Sarangani.
Isa sa mga gin-aligar ni Nineza batok kay Constantino amo ang kuno, pagpabor sang alkalde sa mga operasyon nga ginahimo sang Sagittarius Mines Inc. (SMI), operator sang isa ka $6-B worth gold-copper mining project nga nakabase sa kalapit nga dapit sang Tampakan, South Cotabato.
Sa ginhimo nga rally, ginhambal ni Nineza nga tataw nga makita ang paghatag sang pabor ni Constantino sa SMI tungod sa padayon nga ‘pagsuporta’ sang administrasyon sa mga nagkadaiya nga mga programa sang amo nga kompanya sang minahan sa nagkalain-lain nga dapit sang sini nga banwa.
Sang mga nagliligad nga mga inadlaw, may mga aligasyon man nga kon diin ginabasul kay Constantino ang nga pagbaha sa Brgy. Malandag, upod sang pag-landslide sa pipila ka mga barangay - kay ini nahitungod matud pa sa pagsulod sang amo nga minahan.
Upod man sa mga naguluwa nga pamasangil batok sa administrasyon amo ang wala pagtugot ni Constantino nga maka-rally ang mga kandidato indipendiente para ipabati man sa katawhan ang ila nga mga nagkadaiya nga mga plataporma de gobyerno.
Sa pihak nga bahin, sa ginhimo nga rally sang People’s Champ Movement sang Sabado (Abril 27, 2013), matawhay nga gin-asoy sang amo nga mayor ang pagsabat sa mga isyu nga matud pa, isa lamang ka mga wala basihan nga ‘black propaganda’ sang mga taga-oposisyon – ‘sa tumong nga maguba ang pagsalig sa iya sang publiko’.
“Siguro nakabalo naman ang tanan nga bilang bise mayor sang 2004, ako mismo ang nagperma sang isa ka ordinansiya nga hugot nga nagadumili sang pagmina diri sa banwa sang Malungon. Isa ka ordinansiya nga hasta karon, mabaskog gihapon nga nagabarog para sa nagakaigo nga proteksiyon sang aton kinaiyahan. Ini hilabi na gid sa akon nga mga pinalanga nga katawhan nga nagapuluyo sa mga matag-as nga parte sang kabukiran. Pero indi ko man pwede mapungan ang mandatus nga aprobado sang aton gobyerno, para sa social responsibility program sang Sagittarius Mines. Kung maghatag man sila sang mga nagkadaiya nga programa para ayuda sa edukasyon, panglawas o inprastraktura, mandatus ina sang amo nga kompanya nga gin impose sa ila sang aton nga gobyerno. Hilabi na, nakita ko man nga sa pagkakaron, wala sang iban nga nagabinipisyo sang sini nga mga programa kundi yadtong mga pobre mismo nga mga katawhan. So kung aton ini pungan, mahimo nga daw ginkuhaan lamang naton sang katungod kag prebilihiyo ang mga pumuluyo nga maka-benepisyo para sa ila kaayuhan,” ang siling ni Constantino.
Gindugang man sang alkade nga sa pagka-karon, wala pa sang bisan isa ka pagmina nga natabo sa malungon – ‘gani natingala gid ako (Constantino) nga kung nga-a asta ining mga nagakatabo nga mga kalamidad sa palibot gusto pa gid nila nga ipahid sa akon administrasyon.’
“Sa pagkakaron, kung ano ang maayo para sa aton munisepyo, akon ina pagabatunon para sa kaayuhan sang tanan. Pero ginasiguro ko nga yara lang gihapon sa katawhan ang pagbuot para sa ila kaayuhan sa pag-abot sang tama nga panahon. Kay kung ano ang gusto matabo sang akong nga mga kasimanwa, amo ina ang dapat masunod diri sa banwa sang Malungon.”
“The truth is that, indi supporter si Bongbong sang SMI. Kundi suporter ni Bongbong and SMI pagabot sa mga nagkadaiya nga programa para sa kaayuhan sang mga pumuluyo sang Malungon,” ang siling sang mayor.
Sa amo man nga pakig-estorya, wala na gintagaan sang maayo nga pagtagad ni Constantino ang mga reklamo nga kuno wala ini nagahatag sang permit para sa rally sang mga oposisyon.
Sa malip-ot nga pagdetalye, ginhambal ni Constantino nga nakabalo man ini nga indi mga ‘mang-go’ ang mga nagadalagan nga mga independent candidates hilabi na gid si Nineza nga isa ka abogado.
“Nakahibalo man ini sila, nga bilang mga independent candidates, dapat lamang nga mag-secure ang kada isa sa ila sang nagkadaiya nga permit, para sa ila nagkadaiya nga rally. Kag tungod kay indi man ini sila isa ka partido, wala sila sang katungod nga mag-rally sang tingob. Ini klaro man nga naka-indikar sa nakuha nga permit ni Nineza nga ang amo nga permit para lamang sa iya kag indi pwede nga intrahan sang iban pa nga mga independent candidates. Gani kung gusto nila mag-rally, sige mag apply sila permit kay permahan ko ina tanan,” ang siling ni Constantino. (Isagani Palma – MALUNGON INFOMATION OFFICE).
No comments:
Post a Comment